జగిత్యాల మార్చి 25 (నవ వెలుగు) : జగిత్యాల రాజకీయాల్లో మరో కీలక మలుపు ఆవిర్భవించబోతుంది. ఇది కేవలం ఒక నాయకుడి పార్టీ మార్పు కథ కాదు… నాలుగు దశాబ్దాల రాజకీయ అనుభవం, నిబద్ధత, ఆశలు, అవమానాలు, మరియు ప్రాంతీయ రాజకీయాల లోతైన అంతర్గత పోరాటాల ప్రతిబింబం. మాజీ మంత్రి తాటిపర్తి జీవన్ రెడ్డి తీసుకోబోయే నిర్ణయం వ్యక్తిగత రాజకీయ భవిష్యత్తును మాత్రమే నిర్ణయించదు.. జగిత్యాల రాజకీయ దిశను, ఉత్తర తెలంగాణ శక్తి సమీకరణాలను, కాంగ్రెస్ మరియు బీఆర్ఎస్ మధ్య పోటీతత్వాన్ని కొత్త దశలోకి తీసుకెళ్లే శక్తి కలిగిన పరిణామం ఇది.
ఈ నెల 25న బుధవారం తన కార్యకర్తలతో భారీ సమావేశం నిర్వహించి, తన రాజకీయ భవిష్యత్పై కీలక నిర్ణయం ప్రకటించనున్నారు. ఇది సాధారణ సమావేశం కాదు. నాలుగు దశాబ్దాలుగా కాంగ్రెస్తో ముడిపడిన ఆయన రాజకీయ ప్రయాణంలో ఒక ముఖ్యమైన మలుపు. పార్టీ అధిష్టానం నుంచి వచ్చిన అసంతృప్తి, స్థానిక సమీకరణాల్లో ఏర్పడిన వివక్ష – ఇవన్నీ ఆయనను ఈ నిర్ణయానికి దారి తీశాయని రాజకీయ వర్గాలు అంటున్నాయి. ఈ నేపథ్యంలోనే ఈనెల 24 మంగళవారం రాష్ట్ర పీసీసీ అధ్యక్షులు మహేష్ కుమార్ గౌడ్, ఏఐసీసీ కార్యదర్శి సచిన్ సావంత్ మరియు వేములవాడ ఎమ్మెల్యే ఆది శ్రీనివాస్ జీవన్ రెడ్డిని బుజ్జగించడానికి జగిత్యాలలో భేటీ అయ్యారు. అయితే, తన నిర్ణయంలో ఎలాంటి మార్పు లేదని జీవన్ రెడ్డి స్పష్టం చేశారు. అంతకుముందు రాష్ట్ర మంత్రి దుద్దిల్ల శ్రీధర్ బాబు, మరో మంత్రి అడ్లూరి లక్ష్మణ్ కుమార్, చొప్పదండి ఎమ్మెల్యే మేడిపల్లి సత్యం లు జీవన్ రెడ్డిని బుజ్జగించడానికి వచ్చినా.. తాను కాంగ్రెస్ పార్టీలో నిలువగలిగే పరిస్థితులు లేవని ఖరాఖండి గా చెప్పేశారు. ఇప్పటి పరిస్థితుల్లో కాంగ్రెస్లో కొనసాగడం కుదరదని ఆయన ఇప్పటికే బహిరంగంగా ప్రకటించారు.
రైతు కుటుంబం నుంచి రాజకీయ శిఖరాల వరకు
1951 జనవరి 5న జగిత్యాల జిల్లా పెగడపల్లి మండలం బతికే పెళ్లి గ్రామంలో జన్మించిన జీవన్ రెడ్డి సాధారణ రైతు కుటుంబ నేపథ్యం నుంచి ఎదిగారు. న్యాయవాదిగా వృత్తి ప్రారంభించిన ఆయన 1981లో పంచాయతీ సమితి అధ్యక్షుడిగా రాజకీయాల్లోకి అడుగుపెట్టారు. 1983లో టీడీపీ తరపున జగిత్యాల నుంచి ఎమ్మెల్యేగా గెలిచి, ఎన్టీఆర్ కేబినెట్లో ఎక్సైజ్ మంత్రిగా పని చేశారు. 1984లో కాంగ్రెస్లో చేరిన తర్వాత 1989 నుంచి 2004 వరకు పలుమార్లు ఎమ్మెల్యేగా విజయం సాధించారు. వైఎస్ రాజశేఖర్ రెడ్డి కేబినెట్లో రోడ్లు & భవనాల మంత్రిగా కూడా బాధ్యతలు నిర్వహించారు.
2014లో తెలంగాణ ఏర్పడిన తర్వాత ఉత్తర తెలంగాణలో కాంగ్రెస్కు ఏకైక విజయం జగిత్యాల్లోనే సాధించిన ఘనత ఆయనది. 2019లో ఎమ్మెల్సీగా కూడా ఎన్నికయ్యారు. ఆరు సార్లు ఎమ్మెల్యే, ఒకసారి ఎమ్మెల్సీ, రెండు సార్లు మంత్రి – ఇది ఆయన రాజకీయ జీవితం సాధించిన స్థాయి. జగిత్యాల ప్రజలు “జీవనన్న”గా పిలిచే ఆయన స్థానిక సమస్యలు, రైతు అభివృద్ధి, మౌలిక సదుపాయాలపై దృష్టి సారించిన నాయకుడిగా ప్రసిద్ధి చెందారు.
స్థానిక అసంతృప్తి నుంచి నిర్ణయం వరకు
2018, 2023 అసెంబ్లీ ఎన్నికల్లో ఓటమి ఎదుర్కొన్న జీవన్ రెడ్డి, ఆ తర్వాత బీఆర్ఎస్ నుంచి కాంగ్రెస్లో చేరిన జగిత్యాల ఎమ్మెల్యే డా. సంజయ్ కుమార్తో సంబంధాలు దెబ్బతిన్నాయి. మున్సిపల్ ఎన్నికల్లో టికెట్ల కేటాయింపు, చైర్పర్సన్ ఎంపికలో తన వర్గానికి తక్కువ ప్రాధాన్యత ఇవ్వడం, పదవుల పంపకాల్లో ఏర్పడిన వివక్ష – ఇవన్నీ ఆయనలో తీవ్ర అసంతృప్తిని కలిగించాయి. పార్టీ అధిష్టానానికి పలుమార్లు తన అభ్యంతరాలు తెలిపినా సమాధానం లభించకపోవడంతో ఆయన తన రాజకీయ భవిష్యత్పై పునరాలోచన చేశారు. గత 20 నెలలుగా తాను మానసిక క్షోభ, అవమానాలు భరిస్తున్నట్లు ఆయన ఇటీవలే బహిరంగ లేఖలో వెల్లడించారు. ఇప్పుడు ఆయన కార్యకర్తల సమావేశంలో తీసుకోనున్న నిర్ణయం రాజకీయ వర్గాల్లో ఆసక్తి రేపుతోంది. కొన్ని రిపోర్టుల ప్రకారం ఆయన బీఆర్ఎస్ వైపు మొగ్గు చూపే అవకాశం ఉందని, మరికొన్ని వర్గాలు ఇతర ఎంపికలను కూడా చర్చిస్తున్నట్లు తెలిపారు. ఆయన అనుచరులు ఇప్పటికే సోషల్ మీడియా డీపీలు మార్చుకోవడం, ఇంటి వద్ద ఫ్లెక్సీలు చించేయడం వంటి సంకేతాలు ఇస్తున్నాయి.
రాజకీయ పరిణామాలు ఏమిటి?
జీవన్ రెడ్డి నిర్ణయం కాంగ్రెస్కు ఉత్తర తెలంగాణలో మరో ఎదురుదెబ్బగా మారే అవకాశం ఉంది. రేవంత్ రెడ్డి ప్రభుత్వం ఇప్పటికే అంతర్గత అసంతృప్తులతో మల్లగుల్లాలుపడుతోంది. మరోవైపు బీఆర్ఎస్కు ఇది జగిత్యాలలో కొత్త బలం కలిగించే అవకాశం. కానీ రాజకీయ మార్పులు ఎప్పుడూ ఊహించని ట్విస్టులను తీసుకొస్తాయి. జీవన్ రెడ్డి వంటి సీనియర్ నేత ఏ పార్టీలోకి వెళ్లినా, జగిత్యాల సమీకరణాలు పూర్తిగా మారిపోతాయి. మార్చి 25న జరగబోయే కార్యకర్తల సమావేశం ఒక నిర్ణయం ప్రకటించే వేదిక మాత్రమే కాదు.. ఇది తెలంగాణ రాజకీయాల్లో విలువల రాజకీయాలు వర్సెస్ అవకాశవాద రాజకీయాల మధ్య జరుగుతున్న మౌన పోరాటానికి ప్రతీకగా నిలుస్తుంది. ఒక వైపు నలభై ఏళ్ల విశ్వాసానికి ముగింపు పలకాల్సిన పరిస్థితి, మరోవైపు భవిష్యత్లో ప్రభావాన్ని నిలబెట్టుకోవాలనే రాజకీయ అవసరం, ఈ రెండు దారుల మధ్య నిల్చున్న జీవన్ రెడ్డి ఎంచుకునే మార్గం కేవలం ఆయనకే కాదు, ఆయనను నమ్ముకున్న వేలాది కార్యకర్తలకు, జగిత్యాల ప్రజలకు, మరియు మొత్తం రాష్ట్ర రాజకీయాలకు దిశానిర్దేశం చేసే తీర్పుగా మారబోతోంది.
ఈ పరిణామం ఒక స్పష్టమైన సందేశాన్ని ఇస్తోంది.. పార్టీలు మారినా, నాయకులు మారినా, ప్రజల ఆశలు మాత్రం మారవు. నాయకుల వ్యక్తిగత నిర్ణయాలు కంటే పెద్దది ప్రజల నమ్మకం. ఆ నమ్మకాన్ని నిలబెట్టుకునే మార్గమే నిజమైన రాజకీయ విజయానికి ప్రమాణం. ఇక జీవన్ రెడ్డి తీసుకునే అడుగు.. చరిత్రలో ఒక అధ్యాయం ముగింపా? లేక కొత్త అధ్యాయం ఆరంభమా?.. అన్నది మరికొన్ని గంటల్లో స్పష్టమవుతుంది.
